Saturday, August 25, 2007

သာသနာဖျက်တဲ့ စစ်အာဏာရှင်များ ဟု ရဟန်းပျိုအဖွဲ့က ပြော

ပြည်သူကို ညှဉ်းပမ်းနှိပ်စက်၊ အမျိုးဘာသာ သာသနာကို ဖျက်ဆီးနေသည့် စစ်အာဏာရှင်များကို ဆက်လက် တိုက်ပွဲဝင်ရန် အတွက် ကြိုတင် ပြင်ဆင်ထားရန် မြန်မာနိုင်ငံလုံးဆိုင်ရာ ရဟန်းပျိုများ သမဂ္ဂ အဖွဲ့ချုပ်က ယမန်နေ့က သံဃာတော်များကို လျှောက်ထား နှိုးဆော်ခဲ့သည်။ မြန်မာပြည်တွင်းရှိ သံဃာတော် အဖွဲ့အစည်းတခုဟု ယူဆရသည့် မြန်မာနိုင်ငံလုံးဆိုင်ရာ ရဟန်းပျိုများ သမဂ္ဂ အဖွဲ့ချုပ်၏ စာသင်သား သံဃာတော်များသို့ လျှောက်ထားချက်တွင် ရန်ကုန် ကမ္ဘာအေး ကုန်းမြေ နိုင်ငံတော် ပရိယတ္တိ သာသနာ့ တက္ကသိုလ်တွင် ဆွမ်းမပြည့်စုံ၊ အ၀င်အထွက် တံခါးပေါက်ကြီး အချို့ အပိတ်ခံရမှု၊ အာဏာပိုင်များက ဒါယကာ ဒါယိကာမများကို စစ်ဆေး မေးမြန်းခြင်းများ အပြင် သံဃာတော်များကို အနီးကပ် ၀န်းရံ စောင့်ကြည့်နေသဖြင့် အကျယ်ချုပ်သဖွယ် ဖြစ်ပေါ်နေသဖြင့် ယခုလို ထုတ်ပြန် ပြောဆိုလိုက်ခြင်း ဖြစ်သည်။သည့်အပြင် ပြီးခဲ့သည့် ၁၆ ရက်နေ့က စာသင်သား ရဟန်းပျိုများက သာသနာ့ တက္ကသိုလ်ကို အာဏာပိုင်များမှ ၀င်ရောက် စွက်ဖက် ချယ်လှယ်မှုများကို ထုတ်ဖော် ရေးသားသည့် ကန့်ကွက်စာများကို တက္ကသိုလ်ဝင်း အုတ်တံတိုင်းပေါ်တွင် ရေးသား ဖော်ထုတ်ခဲ့ပြီး၊ အာဏာပိုင်များဘက်က ကျောင်းဝင်း အပြင်ဘက်တွင် လုံခြုံရေး အခြေအနေ တင်းကျပ်လာပြီးနောက် ကြေညာချက် ထွက်ပေါ်လာခြင်းလည်း ဖြစ်သည်။ “ရန်ကုန်သာသနာ့ တက္ကသိုလ်မှာ အစောင့်တွေ ချထားတာ ဟုတ်တယ်။ ကျောက်မျက်ရတနာ ခန်းမကနေပြီး ရေကူးထိ စစ်တပ်တွေရော၊ ရဲလက်နက်ကိုင်တွေရော စောင့်ကြည့်နေတာ တွေ့ရပါတယ်” ဟု ကျောင်းတိုက်အနီးရှိ ရန်ကုန် မြို့ခံတဦးက ပြောပြသည်။ အခြား ဒေသခံ တဦးကလည်း “အ၀င်တံခါးတွေကိုလည်း ပိတ်ထားတယ်ဆိုတာ ဟုတ်တယ်။ ကျောက်မျက်ရတနာ ခန်းမဘက်က တံခါးကိုတော့ ဖွင့်ထားပြီး လူအ၀င်အထွက်တွေကို သေချာ စစ်ဆေး မေးမြန်းတယ်။ ရဟန်းတွေနဲ့ တွေ့ချင်တာ ဆိုရင်လည်း ရဟန်းနာမည်ကိုလည်း တိတိကျကျ ပြောရတယ်။ ဘာကိစ္စ တွေ့ချင်တယ် ဆိုတာလည်း ပြောပြရတယ်။ တခြား တပေါက်ကတော့ လုံးဝကို ပိတ်ထားတယ်။ လူဝင်လူထွက် မရှိဘူး။ဒါယကာ၊ ဒါယိကာမတွေကို အခုလို ကျပ်လိုက်တော့ ဆွမ်းတွေလည်း နည်းသွားတယ်၊ မလုံလောက်တော့ဘူးပေါ့” ဟု ပြောပြသည်။ပြီးခဲ့သည့် လဆန်းပိုင်းတွင် သာသနာ့ တက္ကသိုလ်ကျောင်း အ၀င်ပေါက်များကို အာဏာပိုင်များက စောင့်ကြပ်လိုက်ကာ အ၀င်အထွက် ပြုသူများကို စစ်ဆေး မေးမြန်းမှုများ ပြုလုပ်သလို၊ အမေရိကန် သံရုံးမှ ပို့ချပေးသည့် ဘာသာစကားနှင့် ဗဟုသုတ သင်တန်းများကို မတက်ရောက်ရန် သင်တန်းဆရာ သံဃာတော်များမှတဆင့် ပိတ်ပင်ခြင်းများကို စစ်အာဏာပိုင်များက ဖိအားပေး ပြောဆိုခဲ့ကြကြောင်းနှင့် သက်ဆိုင်ရာ သံဃာတော်များနှင့် မော်ကွန်းထိန်း ဆရာတော်တို့မှ အဆိုပါ ကိစ္စများကို ဖြေရှင်း ဆောင်ရွက်မှု မရှိရာမှ စာသင်သား သံဃာတော်များသည် စာတမ်းများ ရေးသားကာ ရှုတ်ချခဲ့ခြင်း ဖြစ်ကြောင်း သိရသည်။အုတ်တံတိုင်းနံရံတွင် ‘တက္ကသိုလ်ဟာ ထောင်မဟုတ်ဘူး’၊ ‘လွတ်လပ်မှုအတွက် တိုက်ပွဲဝင်ကြ’၊ ‘မော်ကွန်းထိန်း ဘာလဲ’၊ ‘ကြောက်ရွံ့ခြင်းမှ လွတ်မြောက်ရေး’ အစရှိသည့် စာသားများကို အင်္ဂလိပ် သာဘာဖြင့် ရေးသားကြသလို၊ ‘ရဲရင့်ပါ၊ ညီညွတ်ပါ၊ တက္ကသိုလ်ကို ကာကွယ်ပါ၊ သွေးစည်းပါ’ စသဖြင့် မြန်မာလို ရေးသားခဲ့သည်။ယခုလို ထုတ်ပြန်လိုက်သည့် သံဃာတော်များ၏ လျှောက်ထားချက်နှင့် ပတ်သက်ပြီး အိန္ဒိယ အခြေစိုက် မြန်မာနိုင်ငံလုံးဆိုင်ရာ ရဟန်းပျိုများ သမဂ္ဂ ဥက္ကဌ ဦးပညာဝရက “ရဟန်းပျိုများသမဂ္ဂ အဖွဲ့ချုပ်ရဲ့ လုပ်ဆောင်ချက်တွေကို ပုဂ္ဂိုလ် တဦးတယောက် အနေနဲ့ရော၊ ဘာသာရေးသမား တဦးအနေနဲ့ရော၊ နိုင်ငံရေးသမား တဦးအနေနဲ့ရော ထောက်ခံတယ်။ ဘုရားက ရဟန်းတွေကို တခါတလေကျရင် မေးတော်မူတယ်။ မင်းတို့ ယူဆချက်က ဘယ်လိုရှိသလဲ၊ မင်းတို့ ဘယ်လို မြင်သလဲ ဆိုပြီးတော့ ကိုယ့်ရဲ့အမြင်ကို လွတ်လပ်ခွင့် ပေးတယ်လေ။ အာဏာပိုင်က ဒီအတိုင်းဆို ဒီအတိုင်းပဲ။ အဲလို အာဏာပိုင် အကြိုက် လုပ်ရမယ်လို့ ဟောထားတာ မဟုတ်ဘူး။ တရားနဲ့ညီရင် ဒါဟာ ထောက်ခံရမှာပဲ။ သူ့လုပ်ရပ်က တရားနဲ့ မညီရင်တော့ ဒါဟာ ထောက်ခံဖို့ မလိုဘူး” ဟု မိန့်ကြားလိုက်သည်။

0 comments: