မောင်ဝိတ်တပည့်များနှင့် စကားများသဖြင့် အန်အယ်ဒီ ပါတီဝင်များ တိုက်ပိတ်ခံရ

.ဖနိဒါ စနေနေ့၊ အောက်တိုဘာလ 25 2008 21:39 - မြန်မာစံတော်ချိန်

ချင်းမိုင်။ ။ နာမည်ကြီး စီးပွားရေးလုပ်ငန်းရှင် မောင်ဝိတ်၏ တပည့်များဖြစ်ပြီး၊ မူးယစ်ဆေးဝါးမှုဖြင့် အင်းစိန်ထောင်တွင် အကျဉ်း ကျခံနေရသူများနှင့် စကားများသဖြင့် အန်အယ်လ်ဒီ ပါတီဝင် ၃ ဦးကို ပြီးခဲ့သည့် တနင်္ဂနွေနေ့မှ စတင်ကာ ထောင်အာဏာပိုင်များက စစ်ခွေးတိုက်သို့ ပို့လိုက်သည်။

မောင်ဝိတ်၏ တပည့်များသည် ထောင်တွင်း ရေချိုးကန်၌ ရေပိုက်ဖြုတ်ပြီး ကန်တွင်းသို့ ရေမထည့်ဘဲ ပိုက်ဖြင့် ချိုးသည်ကို မကျေနပ်ရာမှ စကားများ ရန်ဖြစ်သောကြောင့် ပါတီခေါင်းဆောင် ဒေါ်အောင်ဆန်းစုကြည် လွတ်မြောက်ရေးအတွက် ဆန္ဒပြမှုဖြင့် ဖမ်းဆီးခံထားရသူ ကြည့်မြင်တိုင်မြို့နယ်မှ အန်အယ်ဒီပါတီဝင် ကိုအောင်ထွန်း၊ ကိုရန်နိုင်ထွန်းနှင့် ကိုဖိုးတုတ် ခေါ် ဦးတင်မောင်ချိုတို့အား စစ်ခွေးတိုက်တွင် တိုက်ပိတ်လိုက်ခြင်း ဖြစ်သည်။

"မောင်ဝိတ်ရဲ့ တပည့်တွေက နိုင်ငံရေး ယုံကြည်ချက်ကြောင့် အကျဉ်းကျနေတဲ့ သူတွေနဲ့ ပြဿနာ တက်တယ်။ ရေချိုးတဲ့ နေရာကို သူတို့တွေက မောင်ပိုင်စီးထားတယ်။ နောက် ရိုက်နှက်တယ်။ ဒါကြောင့် မခံနိုင်လို့၊ ရန်ဖြစ်ကြလို့ တိုက်ပိတ်ထားတယ်" ဟု သူတို့၏ ရှေ့နေ ကိုဖိုးဖြူက မဇ္ဈိမကို ပြောသည်။

သူတို့ ၃ ဦးသည် စီးပွားရေးသမား ဘီလျံနာ မောင်ဝိတ် အပါအ၀င် မူးယစ်ဆေးဝါးမှုဖြင့် ဖမ်းဆီးခံရသည့် ဒဂုံ၊ ကြည့်မြင်တိုင်၊ လသာမြို့နယ်များမှ ကိုအောင်မင်း၊ ကိုနေထွန်းလွင်၊ ကိုကျော်ဖုန်းနိုင်၊ ကိုကျော်လှိုင်၊ အုန်းသီး (ခ) ကျော်ဝင်းတို့နှင့် ပြဿနာတက်ခဲ့ခြင်း ဖြစ်သည်။