Saturday, August 30, 2008

တရားခွင်၌ အများပြည်သူ ကြားနာခွင့်ပြုရန် ၈၈ မျိုးဆက်ကျောင်းသား ခေါင်းဆောင်များ တောင်းဆို

29/08/2008ကိုမြအေး၊ ကိုပြုံးချို၊ ကိုဂျင်မီ၊ ကိုကိုကြီး၊ ကိုမင်းကိုနိုင်၊ ကိုဌေးကြွယ်၊ ကိုအံ့ဘွယ်ကျော်
၈၈ မျိုးဆက်ကျောင်းသားခေါင်းဆောင်များက ရုံးထုတ်ရာတွင် လက်ထိပ်မခတ်ရန်၊ တရားခွင်၌ မိသားစုအပါအ၀င် အများ ပြည်သူနှင့် သတင်းမီဒီယာများကြားနာခွင့်ကို တောင်းဆိုရန်ရှိသည်ဟု ၎င်းတို့၏အမှုများကို လိုက်ပါဆောင်ရွက်နေသည့် ရှေ့နေကြီး ဦးအောင်သိန်းက ဧရာဝတီကို ပြောသည်။“သူတို့မှာ (၈၈ ကျောင်းသားခေါင်းဆောင်များ) နဂိုကတည်းက အဲဒီအစီအစဉ်ရှိတယ်ဆိုတဲ့အကြောင်း မိသားစုတွေ ထောင် ၀င်စာသွားတွေ့စဉ်ကတည်းက တချို့ပြန်ပြောပြတာတွေရှိတယ်၊ အခုတော့ တရားရုံးတင်ရင် တရားဝင်တောင်းပေးဖို့ ကျနော်တို့ကို တိုက်တွန်းမယ်ပေါ့။ ကျနော်တို့ကလည်း သူတို့ရဲ့ ညွှန်ကြားချက်အရ တရားရုံးကို တင်ပြပေးမှာပါ” ဟု ဦးအောင်သိန်းက ရှင်းပြသည်။

ယခုလ ၂၇ ရက်နေ့က ၈၈ မျိုးဆက်ကျောင်းသားအဖွဲ့၏ ခေါင်းဆောင်များအပါအ၀င် အဖွဲ့ဝင် ၃၀ ကျော်ကို တနှစ်ကျော် ကြာအောင် ဖမ်းဆီးထားခဲ့ပြီးမှ ပထမအကြိမ် ရုံးထုတ်ခဲ့သည်။ ထိုသို့ ရုံးထုတ်ခြင်းကို ကာယကံရှင်များ ကြိုတင်မသိထား သကဲ့သို့ မိသားစုဝင်များကိုလည်း အာဏာပိုင်တို့က အကြောင်းကြားခြင်း မရှိပေ။

ကျောင်းသားခေါင်းဆောင် ကိုကိုကြီး၏ ညီဖြစ်သူ ကိုအောင်ထွန်းက “ကျနော်တို့မိသားစုကို အကြောင်းကြားတာ မရှိဘူး … အဲဒီနေ့က ပုံမှန်ထောင်ဝင်စာတွေ့တဲ့နေ့ပေါ့၊ မနက်ပိုင်း သွားတွေ့ခဲ့တယ်။ ရုံးထုတ်သွားတယ်ဆိုတာကို နောက်မှသိရတာ။ အကျိုးဆောင်ရှေ့နေတွေကိုလည်း ပေးမတွေ့ဘူးလို့ ကြားတယ်” ဟု ပြောသည်။

ရှေ့နေကြီး ဦးအောင်သိန်းကလည်း “ရုံးထုတ်တဲ့လူတွေအကုန်တော့ အတိအကျမသိဘူး။ ဟောခန်းထဲမှာ စုထားပြီးတော့ မြို့နယ်အလိုက် အမှုဖိုင်တွေ လုပ်တာထင်တယ်။ လာမယ့် ၂ ရက်၊ ၅ ရက်နဲ့ ၈ ရက်တွေမှာ ရုံးချိန်းရှိတယ်” ဟု ပြောသည်။

၎င်းတို့အားစွဲဆိုထားသည့် ဥပဒေပုဒ်မများကိုမသိရသေးသော်လည်း တဦးချင်းစီကို ပုဒ်မအများအပြား တပ်ထားပြီး အီလက် ထရွန်းနစ်ပစ္စည်းများ ပါဝင်သည့်အမှုများကို ကြမ်းခင်းအားဖြင့် ၁၅ နှစ်အထိ အမိန့်ချနိုင်သည်ဟုလည်း ဦးအောင်သိန်းက ပြောသည်။ ၎င်းအပြင် ယခုရင်ဆိုင်နေရသည့် တရားရုံးသည် အမိန့်ချမှတ်ရာတွင် အပြစ်ဒဏ်ကို တပေါင်းတည်းချမှတ်မည် မဟုတ်ဘဲ သီးခြားချမှတ်လေ့ရှိသည်ဟုလည်း ဆက်ပြောသည်။
၈၈ မျိုးဆက်ကျောင်းသားများ၏ အမှုများကို အတိုက်အခံခေါင်းဆောင် ဒေါ်အောင်ဆန်းစုကြည်၏ အကျိုးဆောင် ရှေ့နေ များဖြစ်ကြသည့် ဦးကြည်ဝင်း၊ ဦးအောင်သိန်းနှင့် ဦးဉာဏ်ဝင်းတို့က လိုက်ပါဆောင်ရွက်လျက် ရှိသည်။

ဧရာဝတီ

0 comments: