Monday, July 21, 2008

မူးယစ်မှုခင်းများဖော်ထုတ်ရခက်ခဲ၊ ထောက်လှမ်းရေးကနိုင်ငံရေးသမားကို ဖမ်းဆီးပြီး အကူအညီတောင်း


ဘီဘီစီ (မြန်မာပိုင်း) - ဇူလိုင် ၂၀၊ ၂၀၀၈
ဇူလိုင်လ ၁၇ ရက်နေ့က အာဇာနည်နေ့ ကျင်းပရေး ဆောင်ရွက်မှုနဲ့ ပတ်သက်ပြီး အဖမ်းအဆီး ခံထားရသူ အမျိုးသားဒီမိုကရေစီအဖွဲ့ချုပ်အဖွဲ့ဝင် ၇ ဦးထဲက ၅ ဦးကို ဒီကနေ့ နေ့ခင်းပိုင်းမှာ အာဏာပိုင်တွေက ပြန်လွှတ်ပေးလိုက်ကြောင်းနဲ့ သူတို့ကို အိမ်တိုင်ရာရောက် ကားနဲ့ ပြန်ပို့ပေးခဲ့တယ်လို့ လွတ်မြောက်လာသူ တစ်ဦးဖြစ်တဲ့ ရန်ကုန်တိုင်း ဒဂုံမြို့သစ်မြို့နယ် အင်န်အယ်လ်ဒီအဖွဲ့ဝင် လူငယ် ကိုသီဟန်က ပြောပြပါတယ်။

"သူတို့ ပြောတယ်၊ နေ့ခင်းပိုင်း ၁ နာရီ ၂ နာရီ ၀န်းကျင်လောက်မှာ၊ ၅ ဦးလုံး လွတ်ပြီတဲ့။ ပြန်လွှတ်ပေးတဲ့ အခါမှာလည်း လက်မှတ်ထိုးခြင်း ဘာခြင်းတော့ မရှိဘူး။ ဒီတိုင်းပဲ အိမ်တိုင်ရာရောက် လိုက်ပို့ပေးလိုက်တာပဲ။"

ကိုသီဟန်နဲ့အတူ လွတ်ပေးလိုက်သူ နောက် ၄ ဦးကတော့ တာမွေမြို့နယ်က ကိုမြင့်ဌေး၊ ခရမ်းမြို့နယ်က ကိုဝင်းမြင့်မောင်၊ တောင်ဒဂုံ(မြို့နယ်)က ကိုသိန်းမြင့်ထွန်းနဲ့ ရွှေပြည်သာ(မြို့နယ်)က မထက်ထက်ဦးဝေ တို့ ဖြစ်ပါတယ်။


နောက်ထပ် အဖမ်းခံရသူ ၂ ဦးဖြစ်တဲ့ ကျူရှင်ဆရာ ကိုအောင်ဖေနဲ့ မြောက်ဥက္ကလာပ(မြို့နယ်)က ကိုကျော်ဇေယျ တို့ကိုလည်း ပြန်လွှတ်ပေးလိုက်တယ်လို့ အာဏာပိုင်တွေက ပြောကြောင်းကို ကိုသီဟန်က ပြောပြပါတယ်။ သူတို့ကို ဖမ်းဆီးထားတဲ့ အချိန်မှာ နိုင်ငံရေးနဲ့ ပတ်သက်လို့ စစ်မေးတာမရှိဘဲ မိမိတို့ရဲ့ ပတ်ဝန်းကျင်မှာ မူးယစ်ဆေးဝါး သုံးစွဲမှုရှိမရှိ မေးမြန်းခဲ့တာသာ ဖြစ်တယ်လို့ ကိုသီဟန်က ဆက်ပြောပြပါတယ်။

“ကြားတာ ပြုတာရှိရင် သူတို့ကို အကူအညီပေးပါတဲ့။ သတင်းတွေ အရမ်းပြတ်နေလို့ပေါ့နော်။ မူးယစ်ဆေးဝါးနဲ့ ပတ်သက်တဲ့ သတင်းတွေ သူတို့က သိပ်မရဘူးပေါ့။ နောက်ပြီးတော့ အခုအချိန်မှာ ဖမ်းဆီးရတာ အရမ်းကျပ်နေတယ်တဲ့၊ အဲဒါကြောင့် သူတို့ အကူအညီ တောင်းရခြင်း ဖြစ်ပါတယ်တဲ့။ အဲသလိုမျိုး ပြောတယ်၊ ကျနော်တို့ကို။ ကျနော်တို့တောင် ကြောင်သွားတယ်။ ကျနော်တို့က နိုင်ငံရေးပဲ၊ ဒီအရေးနဲ့ ဘာဆိုင်လို့လဲပေါ့။ ကျနော်တို့ကို အက်စ်ဘီဌာနမှာ မထားဘဲ ပြည်ထဲရေး(၀န်းကြီးဋ္ဌာနရုံး)ရဲ့ ဒုတိယထပ်လောက်မှာရှိတဲ့ မူးယစ်ဌာနမှာ ကျနော်တို့ကို ထားတယ်။ ကျနော်တို့ ၅ ယောက်ကို"

ပြန်လွတ်လာတဲ့ ကိုသီဟန် ရှင်းပြသွားတာ ဖြစ်ပါတယ်။ အာဇာနည်နေ့ မတိုင်ခင် ဖမ်းဆီးထားသူတွေကို ပြန်လွှတ်ပေးခဲ့ပေမယ့် ဒေါ်အောင်ဆန်းစုကြည် မွေးနေ့မှာ ဖမ်းဆီးခံထားရသူ အင်န်အယ်လ်ဒီအဖွဲ့ဝင် ၁၄ ဦးတို့ကိုတော့ ရုံးတင်တရားစွဲဆိုထားပါတယ်ခင်ဗျာ။

0 comments: